Preske tout moun nan
peyi a tande pale de biwo monetizasyon program èd pou devlopman, men anpil moun
pa gen chans konnen direkteman sa lalwa di sou biwo sa. Nan Atik sa
nou vle ede plis moun ke posib konprann kisa enstitisyon sa ye e
kòman lalwa prevwa fonksyonman l’.
Lwa ki kreye enstitisyon
sa te pibliye nan jounal Monitè jou ki te 4 janvye 2008,li te pase nan
chanm depite a ki te genyen kòm prezidan Jean Marcel Lumerant nan dat ki te
premye (1) Dawout 2007 e nan chanm Sena
ki te genyen kòm prezidan Joseph Lambert nan dat ki te 5 desanm 2007.
Lwa sa divize an 6
chapit ki genyen 18 atik ki defini misyon e fikse estrikti
administratif biwo a , kòman yo fikse règleman entèn yo, ak ki kote enstitisyon
an jwenn lajan pou li fonksyone.
Biwo monetizasyon èd pou
devlopman ki genyen ti sou non biwo monetizasyon chita anba titèl ministè
planifikasyon ak kowoperasyon ekstèn, e se yon enstitisyon otonòm,ki gen
pèsonalite jiridik.
Kòm misyon « nan
patenarya ak òganizasyon nasyonal ak entènasyonal ki enterese, kit li piblik
oswa prive, biwo a genyen poul’ veye aplikasyon konvansyon,
protokòl antant, Akò don oswa prè, ke gouvènman Ayisyen ak donatè oubyen
bayè de fon, siyen, nan kad monetizasyon program ki la pou devlopman an
Ayiti. »
BMPAD
la :
Pou
pouswiv tout Akò, konvansyon ak protokòl ke biwo ki tap gere program
PL-480/titre Ш a;
Negosye
epi siyen avèk founisè kontra produi, ke yap komèsyalize nan kad diferan kontra
ke biwo ap jere ;
Resevwa,
mete nan depo epi komèsyalize produi ke leta ayisyen resevwa nan men ONG ak
oganizasyon ki pa gen objektif fè lajan ki la pou finanse projè devlopman
ekonomik ak sosyal. ;
Propoze
ak konsèy minis yo, fason yo ka itilize lajan ke aktivite ak fon èd
pou devlopman yo genere.;
Finanse
epi swiv projè devlopman yo ;
Mete
sou pye, nan lè yo bezwen, komite konsiltasyon oswa komite kap pilote swivi
konvansyon, echanj lèt, Akò don oswa prè ke lap jere.;
Veye
ke yon pousantaj nan lajan Akò PETROKARIBE al jwenn kolektivite teritoryal yo
pou Gesyon ak devlopman yo. (Atik 1-4)
Biwo
monetizasyo an jere pa yon konsèy administrasyon, yon direksyon general avèk
kèk direksyon teknik epi yon komite direksyon.
Manm
konsèy Biwo monetizasyon yo se :
-
· Minis Ekonomi ak finans lan (ki
se prezidan konsèy la)
-
· Minis planifikasyon ak
kowoperasyon ekstèn nan (vis prezidan)
-
· Minis Afè
etranje ak kilt yo
-
· Minis komès ak endistri
-
· Minis Agrilti
-
· Minis travay piblik, transpò ak
kominikasyon
-
· Gouvenè BRH la.
Direksyon
ekzekitif la gen ladan : direksyon general ,direksyon administratif ak
finans, direksyon analiz ak evalyason epi yon direksyon komèsyal.
Direksyon
general la ekzekite desizyon konsèy la ak projè devlopman yo. Se
prezidan repiblik la ki nome direktè jeneral la.
Direksyon
administratif ak finans lan jere administrasyon ak operasyon finansye biwo a.
Direksyon
Analiz ak evalasyon an etidye epi kontrole program ak projè ke biwo a finanse.
Direksyon
komèsyal la negosye ak patnè yo, resewa epi komèsyalize produi yo bay yo,
espesyalman produi ki soti nan petròl.
Komite
direksyon an la pou elabore program ak projè biwo a.
Biwo
a jwenn resous finansye poul’ fonksyone atravè fon ke yo alwe pou li nan projè
ke lap jere yo. Epi Gouvènman ka bay li lòt lajan poul’ finanse lòt depans ke
li ka genyen.